វិមានឯករាជ្យសាងសង់ឡើងនៅឆ្នាំ១៩៥៨គឺជានិមិត្តរូបបញ្ជាក់ថា ប្រទេសកម្ពុជា បានទទួលឯករាជ្យពីប្រទេសបារាំង នៅថ្ងៃទី៩ខែវិច្ឆិកា ឆ្នាំ១៩៥៣ (គស.១៨៦៣-គស.១៩៥៣) ដែលមានរយៈពេល៩០ឆ្នាំ និងសម្រាប់ជាស្តូបគោរពវិញ្ញាណក្ខន្ធដើម្បីរំលឹកវិញ្ញាណក្ខន្ធយុទ្ធជនអ្នកស្នេហាជាតិដែលបានបូជាអាយុជីវិតកម្លាំងកាយចិត្តប្រាជ្ញាស្មារតីក្នុងបុព្វហេតុរើបម្រះពីនឹមត្រួតត្រារបស់បរទេស។
សំណង់វិមានឯករាជ្យ គឺជាការផ្ដួចផ្ដើមកសាងឡើងដោយព្រះរាជតម្រិះដ៏ភ្លឺស្វាងរុងរឿងរបស់ព្រះបាទសម្ដេចនរោត្តមសីហនុ និងរចនាប្លង់ ដោយស្ថាបត្យករខ្មែរដ៏ល្បីល្បាញ គឺលោក វណ្ណ មូលីវណ្ណ ដែលមានកម្ពស់២០ម៉ែត្រ និង៥ជាន់ ដោយយកលំនាំតាមរាងផ្កាឈូកក្រពុំ តាមគំរូរចនាបថរបស់អង្គរលំអដោយក្បាលពស់នាគរាជចំនួន១០០ (១ជាន់២០, ១ជ្រុង៥)ដែលរំលេចចេញយ៉ាងច្បាស់នូវម៉ូដ របស់ប្រាង្គប្រាសាទអង្គរវត្ត។ចំណែកអ្នកកសាងវិមានឯករាជ្យ តាមប្លង់របស់លោក វណ្ណ មូលីវណ្ណ គឺលោក តឹង វឿតជាស្ថាបត្យករដ៏ល្បីល្បាញនាសម័យកាលនោះ។
ចំពោះក្បាលពស់នាគរាជចំនួន ១០០នេះ មានឯកសារខ្លះបានពន្យល់ថា យកតាមចំនួនឆ្នាំ ដែលប្រទេសកម្ពុជា ស្ថិតនៅក្រោមអាណានិគមនិយមបារាំងជិតមួយសតវត្សរ៍ (១សតវត្សរ៍ មាន១០០ឆ្នាំ) គឺ៩០ឆ្នាំ (១១ សីហា ១៨៦៣-៩ វិច្ឆិកា១៩៥៣)។
បើតាម សាស្ត្រាចារ្យ ភឿង សុភ័ណ្ឌបានបញ្ជាក់ប្រាប់សារព័ត៌មានក្នុងស្រុកនាពេលកន្លងមកថា ជាទូទៅក្នុងទំនៀមទម្លាប់ប្រពៃណីខ្មែរយើង សត្វនាគតំណាងឲ្យទេវកថាព្រោះយើងមិនដែលឃើញនាគរាជទេ យើងឃើញតែពស់ ។នាគរាជនៅលើវិមានឯករាជ្យមានក្បាលចំនួន៥ និងបែរមុខទៅទិសទាំង៤ដែលតំណាងឲ្យបារមីព្រះមហាក្សត្រគ្រប់គ្រងដឹកនាំប្រទេស ។
លោកបន្តថា ៖« ក្បាលនាគទាំង១០០បង្ហាញពីអំណាចបារមីនៃការខិតខំប្រឹងប្រែងរបស់ព្រះមហាក្សត្រក៏ដូចជាប្រជារាស្ត្រខ្មែរទាំងអស់ដើម្បីការពារនូវឯករាជ្យភាពជាតិរបស់ខ្មែរ» ៕
.jpg)
.jpg)