មិនដល់មួយខែនៃដំណើរពីប្រទេសអាល្លឺម៉ង់លើទោចក្រយានយន្ត BMW R1250 តែម្នាក់ឯង បេសកកម្មរបស់លោក លោក អ៊ុ ប៊ុនរ៉េត ទទួលបានថវិកាបរិច្ចាគរហូតដល់ជិត ៤៨៩៩១ ដុល្លារអាមេរិកគិតត្រឹមចុងខែកក្កដា ឆ្នាំ២០២៤។
មូលនិធិគន្ធបុប្ផាកម្ពុជាបានសរសេរលើបណ្ដាញសង្គមថា៖ «យុទ្ធនាការជិះម៉ូតូធំម្នាក់ឯងពីប្រទេសអាល្លឺម៉ង មកកាន់ប្រទេសកម្ពុជា របស់លោក អ៊ុ ប៊ុនរ៉េត ឆ្លងកាត់ចំនួន២២ ប្រទេស ក្នុងចម្ងាយផ្លូវ ២៥ ០០០ គីឡូម៉ែត បានកៀរគរថវិកាបានចំនួនជិត ៥ម៉ឺនដុល្លារអាម៉េរិកហើយ»។
.jpeg)
ថវិកាខាងលើនេះទទួលបានពីសប្បុរសជន ២៣៧ នាក់ ហើយបេសកកម្មសប្បុរសធម៌នេះត្រូវបានគេរំពឹងថានឹងអាចរៃអង្គាសបានថវិកា១០ ម៉ឺនដុល្លារ។
យុទ្ធនាការនេះគ្រោងចំណាយពេលជាង ៤ ខែ ពីខែកក្កដា ដល់ចុងខែតុលា ឆ្នាំ២០២៤ ដោយការជិះម៉ូតូធំតែម្នាក់ឯងនេះក្នុងគោលបំណងផ្សព្វផ្សាយអំពីវប្បធម៌ អរិយធម៌ខ្មែរទៅកាន់បណ្ដាប្រទេសនីមួយៗដែលបានឆ្លងកាត់ ក៏ដូចជាដើម្បីកៀរគរថវិកាបរិច្ចាគជូនមូលនិធិគន្ធបុប្ផាកម្ពុជាដើម្បីរួមគ្នារក្សានិរន្តរភាពនៃកិច្ចដំណើរការរបស់មន្ទីរពេទ្យគន្ធបុប្ផាផងដែរ។
មុនចាប់ផ្ដើមចេញដំណើរពីទីក្រុងមូនិកប្រទេសអាល្លឺម៉ង់ នៅព្រឹកព្រលឹមថ្ងៃទី ៥ ខែកក្កដា ប្រធាន BMW Club កម្ពុជា លោក ប៊ុនរ៉េត បានលើកឡើងថា៖ «កុមារគឺជាធនធានដ៏មានតម្លៃហើយក៏ជាក្តីសង្ឃឹមនៃអនាគត របស់ពិភពលោកផងដែរ។ កុមារកម្ពុជាសរុបជិត ១លាននាក់ បានមកសម្រាក និងព្យាបាល នៅមន្ទីរពេទ្យគន្ធបុប្ផានាឆ្នាំ២០២៣ និងប្រមាណ ២៨លាននាក់ ចាប់តាំងពីពេលមន្ទីពេទ្យចាប់បើកមក»។
.jpeg)
បុរសវ័យ ៤៤ឆ្នាំដែលចូលចិត្តជិះម៉ូតូធំផ្សងព្រេងនិងបំពេញបេសកកម្មសប្បុរសធម៌រូបនេះបានរៀបរាប់ទៀតថា៖ «បន្ទាប់ពីបានស្ដាប់បទបង្ហាញរបស់លោកគ្រូ ឃុន លាងឈុនដែលជាអនុប្រធានមន្ទីពេទ្យ ខ្ញុំគិតចិត្តថា ខ្ញុំនឹងរួមចំណែកការងាររៃអង្គាសថវិកាដើម្បីកុមារជាមួយនឹងមូលនិធិគន្ធបុប្ផាកម្ពុជា»។
ក្រៅពីបំណងចម្បងជួយដល់មូលនិធិគន្ធបុប្ផាដែលផ្តល់ការព្យាបាលដោយឥតគិតថ្លៃដល់កុមាររាប់លាននាក់ ក្នុងប្រទេសកម្ពុជាប្រធាន BMW Club រូបនេះ បន្ថែមថា បេសកកម្មជិះម៉ូតូធំតែម្នាក់ឯងនេះលោកមានបំណងបង្ហាញពីទំនាក់ទំនងប្រវត្តិសាស្ត្រនិងវប្បធម៌ដ៏រឹងមាំរវាងប្រទេសអាឡឺម៉ង់ និងកម្ពុជា។លោកក៏ចង់បញ្ជាក់ផងដែរថាកម្ពុជា គឺជាប្រទេសមានសុខសន្តិភាពពេញលេញពោរពេញទៅដោយក្តីស្រឡាញ់ និងរួសរាយរាក់ទាក់ សម្រាប់ភ្ញៀវទេសចរណ៍មកពីអឺរ៉ុបនិងពិភពលោក។
នៅថ្ងៃទី ២៩ខែកក្កដា ពេលដែលម៉ូតូរបស់លោកទៅដល់ទីក្រុងមីឡាន ប្រទេសអ៊ីតាលីលោកបានបង្ហោះរូបភាពក្រោមកម្ដៅថ្ងៃ និងបរិយាយថា៖ «សីតុណ្ហភាព៣៤°c ប៉ុន្តែមានអារម្មណ៍ហាក់ដូចជា ៣៨°c ដោយសារនៅអឺរ៉ុបមិនមានសំណើមដូចនៅតំបន់អាស៊ី។ ខ្ញុំមកដល់មីឡាន ប្រទេសអ៊ីតាលី ជាប្រទេសទី៦ក្នុងដំណើរឆ្ពោះទៅកម្ពុជាតែម្នាក់ឯងដោយម៉ូតូ។ ខ្ញុំសប្បាយចិត្តនឹងឆ្លើយប្រាប់បរទេសថា ខ្ញុំខ្មែរ ខ្ញុំជិះទៅកម្ពុជា»។
.jpeg)
គួរបញ្ជាក់ថាការជិះម៉ូតូខាងលើនេះ ទទួលបានការគាំទ្រពីប្រទេសអាល្លឺម៉ង់សហគមន៍អ្នកធុរកិច្ចអាល្លឺម៉ង់នៅកម្ពុជា (GBC) ស្ថានទូតអាល្លឺម៉ង់ប្រចាំនៅកម្ពុជា។
លោក Stefan Messerer ឯកអគ្គរដ្ឋទូតអាល្លឺម៉ង់បានសម្ដែងចំណាប់អារម្មណ៍ថា៖ «ខ្ញុំមានសេចក្តីរំភើបរីករាយនិងគាំទ្រលោក អ៊ុ ប៊ុនរ៉េត ក្នុងការបំផុសគំនិតបង្កើតព្រឹត្តិការណ៍នេះ។ វាឆ្លុះបញ្ចាំងពីទំនាក់ទំនងដ៏រឹងមាំរវាងប្រទេសទាំង២ និងបង្ហាញពីសារសំខាន់ភាពជាដៃគូ សាមគ្គីភាព មិត្តភាពអន្តរជាតិនិងការងារសប្បុរសធម៌»។
ដំណើរជិះម៉ូតូរបស់លោកគ្រោងនឹងបញ្ចប់នៅរាជធានីភ្នំពេញនៅថ្ងៃទី ២៥ ខែតុលា ឆ្នាំ២០២៤ ដើម្បីប្រារព្ធពិធីបុណ្យស្រាបៀរដ៏ធំរបស់អាល្លឺម៉ង់គឺ Oktoberfest Cambodia ។
គួររំឭកផងដែរថាកាលពីឆ្នាំ ២០១៦ លោក ប៊ុនរ៉េត ធ្លាប់បានដឹកនាំក្លិប BMW ធ្វើដំណើរឆ្លងកាត់ប្រទេសជាច្រើនជាមួយម៉ូតូ BMW រត់លើផ្លូវរាប់ពាន់គីឡូម៉ែត្រដោយជួបប្រទះនឹងស្ថានភាព និងអាកាសធាតុផ្សេងៗក្នុងបំណងផ្សព្វផ្សាយពីកម្ពុជានិងជិះម៉ូតូដើម្បរៃអង្គាសប្រាក់សម្រាប់មូលនិធិគន្ធបុប្ផាដើម្បីរួមចំណែកជួយអនាគតកូនខ្មែរ។
.jpeg)
ដោយសារទរបេសកកម្មសប្បុរសធម៌នេះមូលនិធិគន្ធបុប្ផាកម្ពុជា បានលើកឡើងថា៖ «សូមថ្លែងអំណរគុណជូនសប្បុរសជនទាំងក្នុងនិងក្រៅប្រទេសទាំងអស់ចំពោះការចូលរួមបរិច្ចាគរួមគ្នារក្សានិរន្តរភាពមន្ទីរពេទ្យគន្ធបុប្ផាដើម្បីនាំភាពញញឹមរបស់កុមារដែលជាអនាគតដ៏ភ្លឺស្វាងរបស់កម្ពុជា»។
សម្រាប់ការបរិច្ចាគដល់មូលនិធិគន្ធបុប្ផាសូមចូលទៅកាន់តំណភ្ជាប់ មូលនិធិគន្ធបុប្ផា
.jpg)
.jpg)
.jpg)
.jpg)